無論係男人或者女人,每個人都會保養自己嘅頭髮, 因為佢係外貌嘅一部分 ,但係要洗出動人嘅髮質, 究竟有咩秘技呢?其實, 喺繁忙嘅都市生活, 可能每個人都要面對唔同嘅頭髮問題, 今次我地就由 “洗”方面入手啦:

1.  頭髮嘅濕潤度

頭髮太乾, 可能會好易開叉, 好似掃帚咁, 其實表示咗頭髮嘅水分同營養唔夠。大家有無用好熱嘅水洗頭呀? 熱嘅水洗頭可以去油脂, 但係長期咁用, 只會令到頭髮嘅光澤無哂嫁, 所以最好用溫水。而且, 用溫水洗頭可以令人處於一個放鬆嘅狀態, 令到壓力減少, 頭髮自然健康成長。

另外, 大家有無染髮或者電髮嘅習慣呢?如果有嘅話, 建議用一啲濕度比較高嘅洗頭水或者染髮專用嘅洗髮水, 咁樣可以保持秀髮嘅濕度, 又可以防掉髮。仲有BO, 大家要避免用風筒嚟吹佢, 俾佢自然乾, 咁至可保持秀髮嘅美麗~

如果真係頭髮太乾, 可以定期做吓HAIR MASK, 一星期可以做2次髮膜。髮膜係有保濕丶護髮同焗油嘅作用, 能夠修飾分叉嘅髮根, 令到頭髮回復彈性同水分。而大部分分叉嘅位置喺頭髮中間至到髮尾, 可以喺沖完涼之後, 頭髮大約8成乾時, 輕輕地喺頭髮中間至到髮尾塗上少少嘅髮膜, 第二天要沖一沖水就可以啦~

2.  頭髮嘅油分

好多朋友都同我煩惱話, 唉!我個頭太油啦, 點算好?其實, 頭髮有少量嘅油分, 證明頭髮喺健康咁生長, 所以唔洗擔心要買一啲去頭油嘅洗髮水, 只會令到頭髮無天然嘅油分, 咁樣會好易掉髮嫁~

不過, 如果太油嘅話, 建議用綠茶或者草本植物類嘅洗頭水, 一嚟性質比較溫和, 唔會刺激頭嘅毛囊, 二嚟可以去除頭嘅油分。不過, 最緊要嘅係草本植物嘅氣味帶嚟清新嘅感覺, 又可以減壓, 因為大部分頭油多嘅朋友多數都係生活喺緊張嘅環境, 所以可以有治標又治本嘅功效。

3.  頭髮嘅頭皮數量

大家一定有時會好多頭皮喺個頭度嘅時候, 其實頭皮太多有好多原因, 例如: 用嘅水溫太熱, 但令到大量嘅頭皮脫落, 所以大家一定記得用溫水洗頭。

另外, 其實洗頭洗得唔乾淨, 都會令到頭皮增加同脫落, 所以最近流行嘅無矽洗髮水係天然成分製造, 即使洗得唔乾淨嘅情況下, 都唔會令到頭皮增加。

仲有BO, 洗頭時記住要用指尖按摩頭皮,促進血液循環, 幫助頭髮健康生長, 千萬唔好用手抓頭皮嚟洗頭, 只會令更多頭皮脫落而己~