大家生活喺繁忙嘅都市, 自然會有唔同嘅壓力, 無論係家庭上丶學習上, 甚至工作上, 而身心嘅健康都好重要嫁, 如果得唔到充分嘅休息, 好容易會積勞成病嫁。所以, 大家可以去吓旅行散吓心, 不如我為大家介紹吓日本嘅治療之地: 菊池。佢係位於熊本, 係一個 “泉水之鄉”, 所以造就咗好多天然景物同產物~

1.  雄偉嘅瀑布

喺菊池溪谷會發現有好多著名嘅瀑布, 佢地都係由阿蘇外輪山流落嚟嫁, 例如: 黎明瀑丶天狗瀑等等。瀑布流落嚟嘅澎湃水聲, 令人精神為之一振, 而且望住咁清澈嘅藍綠色溪水, 什麼煩惱都一掃而空~

陽光曬落嚟嘅溪水好似一幅立體嘅山水畫!

菊池除咗睇溪水丶瀑布之外, 溫泉都係遠近馳名嫁, 因為佢嘅水溫能夠保持到40度左右, 而且硫磺仲可以消除疲勞, 仲可以美顏功效, 大家不妨去試試!

話個小貼士俾你知: 喺美術館附近有免費浸足湯, 可以一洗長途拔涉嘅辛勞, 大家仲可以參觀埋美術館添~

2.   豐富嘅乳類產品

菊池以畜牧業為主, 所以嗰度啲乳類產品特別好食, 例如: 阿蘇牛奶丶芝士等等, 加上天然無雜質嘅水源和無污染嘅空氣, 種出嚟嘅草特別多, 所以盛產咗最著名嘅熊本牛同埋乳類製品。

飲完白滑濃郁嘅純牛乳之後, 覺得皮膚都變靚啲啦

除咗牛乳之外, 牛乳嘅副產品即係雪糕, 都好好食嫁。不過, 我介紹嘅唔係普通嘅雪糕 而係喺山鹿有名嘅雙子雪糕 (TWINSTAR)。

呢隻TWINSTAR屢得大獎係因為佢嘅外形就好似一件藝術品, 而且喺味道上都有保證, 因為牛乳來自自家牧場, 至可以保持雪糕又香又滑嘅口感~

睇住一塊塊雪花嘅熊本牛, 不論用嚟SABUSABU或者BBQ都好好食~

好多人會到日本買米, 菊池都唔例外, 因為菊池嘅水源豐富, 而且清新嘅空氣, 自然種出嚟嘅作物都特別好食。大家不妨買啲返去做手信都可以嫁~

3.  薪火相傳嘅和菓子

大家一定食過日本嘅名產和菓子啦, 但係唔知大家有無試過自己製作出嚟呢? 日本嘅傳統有名老店中原松月堂希望能夠宣揚和菓子嘅歷史丶文化同製作過程, 由當地嘅老師傅即場教授製作和菓子, 大家可以製作自己設計嘅和菓子, 係咪另有一番風味呢?另外, 大家仲可以學埋茶道, 好食嘅和菓子一定要配一柸好飲嘅茶, 至可以融入到傳統日本文化!

快到盛夏啦, 大家會設計一個點樣嘅和菓子呢?