講到九州, 大家即時會諗起咩?  九州拉麵?? 溫泉?? 或係火山? 上次介紹咗四國嘅跳舞祭, 今次會同大家一齊去九州去發掘更多夏日活動呢?

1.  豪斯登堡

豪斯登堡係九州著名嘅日本景點之一, 因為佢有好多古典式荷蘭建築物之餘, 仲喺每年嘅夏天都有放煙花嘅傳統, 今年都唔例外, 會舉行 "Natsu Ichiban" Hanabi Festival。喺浪漫嘅夜空上, 由當地出名設計師所設計嘅藝術形嘅煙花會同世界各地嘅煙花進行比賽, 煙花嘅盛放再配合美妙嘅音樂旋律, 咁璀璨又浪漫嘅情景真係情侶嘅好去處呢~

豪斯登堡除咗以煙花聞名之外, 美麗嘅花卉都係佢嘅熱點之一, 而宜家正係日本特產繡球花嘅季節。當大家一邊慢步喺歐陸式嘅街頭, 一邊欣賞住顏色繽紛嘅圓渾渾繡球花, 心情同步伐都變得輕快起來~

一路越過圓拱古色古香嘅小橋, 再睇到迷人可愛嘅繡球花, 真係一件賞心樂事!

喺豪斯登堡入邊嘅繡球花多達800多種, 琳瑯滿目, 有紫綠色啦丶紫黃色啦丶藍黃色.....每種都互相爭妍鬥麗, 成為當地嘅打卡聖地!

到咗晚上, 繡球花之路嘅兩旁點燈花照射之下, 繡球花又顯出另一分神秘之美嫁~

2.  戶畑祇園嘅大山笠

點解有幾個咁高嘅燈塔呢?  係咩嚟嫁?  其實係戶畑祇園嘅大山笠, 係九州嘅三大傳統祭典活動之一。相傳喺好耐之前, 向須賀大神曾經幫當地嘅居民驅走咗疫症, 為咗紀念佢嘅功德, 所以建成12層嘅燈籠以示感謝!

12層嘅燈籠都係由人手一層層咁疊上咁高處, 令人好佩服九州民眾嘅力量!

而建好嘅大山笠會由人手抬住去祭紀, 雖然大山笠嘅體積好巨大, 但係都無嚇怕咗抬大山笠人嘅熱誠, 就連中小學生都一齊參加。

3.  佐賀嘅風鈴祭

而最後同大家介紹嘅係佐賀嘅風鈴祭啦。日本提到最出名嘅陶瓷地方不能不提係佐賀, 而今次同大家去伊萬里大川內山內欣賞風鈴啦~日本嘅夏天到啦, 好多家戶都會擺放風鈴去避邪, 所以"風鈴"對於日本夏天嚟講係必須嘅。而佐賀嘅伊萬里大川內山每年都會有風鈴祭,  沿住清靜天然山林嘅道路旁, 會發現有好多唔同嘅風玲懸掛住。當風吹過風玲時發出嘅清脆悅耳聲音, 為我地洗滌心靈, 又為我地帶嚟陣陣涼意~另外, 風鈴祭仲會有大合唱丶樂器演奏同點燈儀式嫁, 大家不妨去睇睇。

可以見到咁細小嘅風鈴能夠繪有山水畫, 花卉, 甚至水果等等唔同嘅圖案, 可體會到佐賀精湛嘅陶瓷文化呢~