就嚟到8丶9月啦, 又係好多朋友仔會結婚嘅時間。而婚禮上唔少得嘅就係結婚蛋糕啦, 如果可以俾一個夢幻嘅結婚蛋糕你, 大家又會覺得我喺度同你講緊笑呢?其實, 韓國著名嘅糕點師Ms. Atelier Soo可以助你夢想成真, 皆因佢製作嘅蛋糕已經深受各地嘅FANS 支持, 點解?  因為佢係用花卉為題嚟設計蛋糕嘅, 而且味道仲好好食嫁。 通常結婚蛋糕都係用花做主題啦, 有咩咁特別呀?  睇吓下面就知道佢嘅蛋糕已經可以幾可亂真~

相信大家如果唔將蛋糕切開, 都唔覺得佢係蛋糕, 無論係葉子嘅紋理或係花芯都製作得仿如真實咁。

Ms. Atelier Soo親手用唔同種類嘅花卉一層一層咁鋪上去, 真係少D功夫都唔可能有咁美嘅設計!

嘩!  呢個結婚蛋糕用咗粉紅為底色嘅少女風, 上面再以粉色系列嘅玫瑰花丶桔梗.....真係令人仿如童話之中嘅公主~

Ms. Atelier Soo設計嘅婚宴蛋糕大致可以分為2類:  花圈型同花束型。一個結婚典禮上, 其實花圈係新娘子頭上嘅裝飾,  所以Ms. Soo將蛋糕同新娘子嘅結婚服飾嘅概念融合, 係希望可以祝賀新娘子能夠幸福快樂。花卉係會隨住四季而變化, 而花圈形嘅婚宴蛋糕都用咗季節為題。

清新怡人嘅春夏風蛋糕, 充滿住海洋嘅色彩, 喺非洲菊旁邊仲伴隨朵朵嘅粉藍色小花, 真係好夢幻~如果仔細咁觀察, 會發現每朵花卉開嘅方向都不一, 可以見到Ms. Soo對新人嘅祝福。

另外, 呢款夏日香氣嘅蛋糕採用咗好多鮮艷奪目嘅顏色, 例如:   檸檬黃丶橘子橙......朵朵都充滿活力但又有浪漫嘅夏日情懷, 會唔會係你嘅心頭好呢?

而想配合更華麗嘅婚禮, 可以試吓呢款喺秋季設計, 採用比較大型嘅秋色花朵嚟配合秋天嘅涼意~

此外, 聖誕佳人會唔會對呢款冬日戀歌情有獨鍾呢?用咗濃情嘅紅色聖誕花, 再加上平時聖誕樹上見到嘅葉子裝飾, 好有冬天嘅淒美感~

至於花束型嘅婚宴蛋糕其實等於新娘子行禮時嘅花束咁, 而Ms. Soo用咗好多唔同嘅花卉來鋪滿全個蛋糕, 滿載住對新娘子嘅祝福嫁~

呢個小巧迷人森林風嘅蛋糕會唔會係你嘅心頭好呢?

而呢款簡約風嘅玫瑰花已經深受好多朋友嘅歡迎~

Ms. Soo除咗設計結婚蛋糕之外, 為咗迎合花嘅主題, 仲特地設計咗好多小巧又別緻嘅花卉cupcake, 款款都係經過Ms. Soo對大自然嘅熱愛而精心設計~

呢款cupcake 仲有埋法國甜點馬卡龍, 真係又sweet又美麗, 唔捨得食咗佢~